Қазақстан WADA-ны қаржылай қолдады
Дүниежүзілік допингке қарсы агенттік (WADA) Қазақстан Республикасы Туризм және спорт министрлігінің допингке қарсы ғылыми зерттеулерді дамытуға бағытталған елеулі қаржылық үлес қосқанын жариялады.
Аталған сома Қазақстанның WADA бюджетіне жыл сайынғы жарнасына қосымша болып табылады және агенттік пен Министрлік арасында қол қойылған өзара түсіністік туралы меморандум аясында расталды.
«WADA-мен ынтымақтастық біз үшін стратегиялық маңызға ие. Қазақстанда таза спорт мәдениетін қалыптастыруға, халықаралық стандарттарды нығайтуға және әлемдік озық тәжірибиелерді енгізуге басымдық беріледі. Еліміздің допингтің алдын алу және білім беру бағытындағы бағдарламаларды қолдап, оларды жүйелі түрде жүзеге асырып келеді», — деді ҚР Туризм және Спорт министрі Ербол Мирзабосынов.
Сонымен қатар, WADA мен Қазақстан Үкіметі агенттіктің Атқарушы комитеті мен Құрылтай кеңесінің отырыстарын 2027 жылғы қараша айында еліміздің астанасы — Астанада өткізу туралы келісім жасасты. Бұл іс-шараларды өткізу мемлекеттік тараптың жаһандық допингке қарсы жүйені дамытуға қосқан тағы бір маңызды үлесі болмақ.
Тиісті келісімдер 2026 жылғы 22 наурызда Польшаның Торунь қаласында өтіп жатқан жеңіл атлетикадан жабық ғимараттағы әлем чемпионаты аясында WADA президенті Витольд Банька мен Қазақстан Республикасының Туризм және спорт министрі Ербол Мырзабосыновтың кездесуі нәтижесінде қол жеткізілді.
WADA президенті Витольд Банька Қазақстан тарапынан көрсетілген қосымша қаржылық қолдау халықаралық деңгейдегі допингке қарсы ғылыми зерттеулердің дамуына елеулі ықпал ететінін атап өтті.
«Қазақстанның Туризм және Спорт министрлігіндегі серіктестеріміздің қосымша үлесін жоғары бағалаймыз. Бұл қолдау бүкіл әлем бойынша допингке қарсы зерттеулердің дамуына айтарлықтай үлес қосады. Сондай-ақ, Қазақстан Үкіметіне WADA Атқарушы комитеті мен Құрылтай кеңесінің отырыстарын қабылдауға дайын екендігі үшін алғысымды білдіремін. Бұл елдің өңірде таза спортты ілгерілетудегі көшбасшылық рөлінің артып келе жатқанын көрсетеді», — деді ол.
Айта кету керек, WADA-ның негізгі қаржыландыруы Олимпиадалық қозғалыс пен әлем елдерінің үкіметтері тарапынан түсетін жарналар есебінен қалыптасады. Мемлекеттік жарналар агенттік 1999 жылы құрылғаннан кейін бекітілген өңірлік қағидат бойынша бөлінеді. Олимпиадалық қозғалыс WADA бюджетін тең қаржыландырып, оның 50%-ына дейінгі бөлігін қамтамасыз етеді. Тұрақты жарналардан бөлек, агенттік қызметі серіктестердің қосымша инвестициялары мен халықаралық ұйымдармен бірлескен жобалар арқылы да қолдау табады.
